Heildræn nálgun skiptir sköpum þegar hugað er að heilsu einstaklings og þá sérstaklega kvenna á miðjum aldri sem standa frammi fyrir breytingu á kvenhormónakerfi sínu. Heilsuvandamál kvenna á miðjum aldri og áhrif hormónauppbótarmeðferðar eru samtengd ýmsum þáttum í lífi þeirra, svo sem lífsstíl, streitustigi, næringu, hreyfingu og svefni. Heildræn nálgun tryggir að tekið sé tillit til allra þessara þátta þegar teknar eru ákvarðanir um meðferðarúrræði fyrir konur á miðjum aldri.
Kortlagning á sjúkrasögu, núverandi einkennum, lífsstílsþáttum og sálrænni líðan sem og bjargráðum hjálpar heilbrigðistarfmanni að bera kennsl á vandamál og sníða meðferðaráætlun fyrir hverja og eina konu. Hver og ein kona er einstök og það sem virkar fyrir eina konu hentar kannski ekki annarri. Með heildrænni nálgun geta heilbrigðisstarfsmenn búið til persónulegar meðferðaráætlanir sem taka á sérstökum þörfum, óskum og markmiðum einstaklingsins. Þessi einstaklingsmiðaða nálgun eykur líkur á farsælum árangri og bætir ánægju sjúklinga.
Fyrir konur sem upplifa hormónaójafnvægi eða tíðahvörf getur þetta falið í sér að skoða lífsstílsbreytingar, streitustjórnunaraðferðir, næringaraðgerðir og aðrar viðbótarmeðferðir samhliða eða í stað hormónauppbótarmeðferðar.
Ef kona upplifir einkenni sín hamlandi fyrir sín lífsgæði er mikilvægt að skoða alla þætti sem geta eflt hennar vellíðan. Fræðsla og stuðningur við konur getur verið lykill að því að þær tileinka sér heilbrigðan lífstíl, svo sem reglulega hreyfingu, jafnvægi í næringu, nægan svefn og aðferðir til að draga úr streitu. Þessar fyrirbyggjandi aðgerðir geta hjálpað til við að koma í veg fyrir heilsufarsvandamál í framtíðinni og hámarka almenna vellíðan.
Ef þú lesandi góður ert kona á miðjum aldri, sem hefur yfir langan tíma eða nýverið upplifað breytingar á líkamlegri eða andlegri heilsu þá er mikilvægt að skoða eftirfarandi atriði:
• Hormónabreytingar: Tíðahvörf hafa í för með sér verulegar hormónabreytingar sem hafa áhrif á ýmsa þætti heilsu, þar á meðal beinþéttni, hjarta- og æðaheilbrigði og skap. Vert er að skoða hormónauppbót ef einkenni eru hamlandi.
• Beinheilsa: Konur eru í aukinni hættu á beinþynningu á miðjum aldri vegna lækkandi estrógenmagns. Regluleg hreyfing og nægileg inntaka af kalki og D-vítamíni eru nauðsynleg til að viðhalda beinþéttni.
• Hjarta- og æðaheilbrigði: Hættan á hjartasjúkdómum eykst eftir tíðahvörf. Þættir eins og kólesterólmagn, blóðþrýstingur og lífsstílsvenjur eins og mataræði og hreyfing gegna mikilvægu hlutverki í hjarta- og æðaheilbrigði.
• Geðheilsa: Hormónabreytingar og samfélagslegar væntingar geta stuðlað að geðheilbrigðisáskorunum. Oft er aukin streita hjá konum á miðjum aldri ásamt auknum kvíða og þunglyndi.
• Æxlunarheilbrigði: Þó að frjósemi fari minnkandi með aldri, ættu konur samt að setja æxlunarheilbrigði í forgang, þar á meðal reglulega kvensjúkdómaskoðun og skimun fyrir sjúkdómum eins og brjósta- og leghálskrabbameini.
• Lífsstílsþættir: Mataræði, hreyfing, svefngæði, streitustjórnun og það að forðast tóbak og óhóflega áfengisneyslu hefur allt áhrif á heilsu og vellíðan kvenna á miðjum aldri.
• Félagslegur stuðningur: Sterk félagsleg tengsl og stuðningsnet geta haft jákvæð áhrif á heilsu kvenna á miðjum aldri með því að veita tilfinningalegan stuðning, draga úr streitu og hvetja til heilbrigðrar hegðunar.
Upplifi ég einkenni mín hamlandi fyrir mín lífsgæði?
Margt er hægt að gera til að láta sér líða betur ef einkenni breytingaskeiðsins herja á. En mikilvægast er að vita að það er hægt að fá aðstoð til að líða betur ef einkennin eru hamlandi fyrir lífsgæði þín. Að skoða heilsuna heildrænt með sérsniðinni meðferðarráætlun er lykill að aukinni vellíðan þegar að heilsa kvenna á miðjum aldri en skoðuð og meðhöndluð.
Hjá GynaMEDICA nálgumst við heilsu skjólstæðinga okkar heildrænt og skoðum hvaða lausnir eru ákjósanlegastar fyrir hverja og eina konu.
Heimildir:
Menopause, wellbeing and health: A care pathway from the European Menopause and Andropause Society - PubMed
(Fetter & Koch, 2009, Promoting Overall Health and Wellness Among Clients: The Relevance and Role of Professional Counselors. Adultspan Journal)